Strangers

A. - Għandha xi ħames jew sitt għatsiet fuq dahra, kannella skuri. Xufftejha tagħfashom ħafna ma' xulxin meta tiekol u ttiegħem l-ikel.

C. - Tikka fuq idejha u tħobb tross xufftejha ma' xulxin jew titfagħhom fuq xaqliba minnhom. Tħobb tikxef spallejha wkoll.

D. - Qatt ma naf li rajtha b'xagħarha maħlul u tħobb tilbes ħafna n-nuċċali skur li għandha anke meta tkun ġewwa jew meta barra ma jkunx xemxi.

E. - Għandha ħarsa minaċċuża u dejjem qisha maħnuqa. Għajnejha żgħar.

G. - Dejjem b'għajnejh imżellġin - tistennieh se jinfexx f'bikja minn mument għal ieħor. Qatt ma jitkellem bl-ikel f'ħalqu, anke jekk ikollu ftit. L-ewwel iwebbilna b'xi ħaġa li jkun se jgħid imbagħad ikollna noqogħdu nistennewh jomogħdha sal-aħħar.

H. - Il-frejm tan-nuċċali trasparenti. Naħseb iqum il-flus. Tħobb tgħid ħafna: "U ejja vera?!".

J. - Qatt m'għamlet b'gramma rtokk. Meta tidħak tagħsar ħafna għajnejha, tant li jiġu qishom linja mimduda. Meta tilletika jew tgħolli leħinha jkollha vuċi kemmxejn maskili.

J. - Għajnejha u ħalqha żgħar. Kwieta u kliema meqjus, imma naħseb għax ma tkunx kunfidenti biżżejjed għax ġieli rajtha tikkummiedja meta tkun a suo agio.

K. - Tfakkarni fl-istudji tal-bijoloġija u xjenzi oħra relatati. Bajda ħafna u dejjem bil-wardiet.

L. - Għandu ħafna tbajja fuq wiċċu, imma kif jgħidu, iż-żmien isajjar il-bajtar. Dejjem emmen fija.

M. - Meta titbissem, mix-xedaq tan-naħa tax-xellug tagħha tisbokka sinna. Tirranġa xagħarha spiss għax ħafif ħafna u joqgħod jaqagħlha quddiem wiċċha.

M. - Għandha tebgħa żgħira taħt il-minkeb. Roża. Għajnejha forma ta' lewża matura b'ħarira nemex taħthom.

N. - Għajnejha kbar koħol nir. Xagħarha dejjem ikun riħa ta' shampoo frisk anke meta nkunu mdawwrin b'foga pessma ta' sigarri u sigaretti. Tħobb titbissem.

R. - Iħobb jheżżeż snienu kull mument. Nieqes mill-body language.

S. - Bil-barbetti u dejjem b'leħja ta' tlett ijiem jew erba'. Ma tantx għadu jagħmel ġel.

T. - Is-suf t'għajnejha pulit ħafna allavolja ma jidhirx mittiefes. Tismar ħafna fis-sajf u tħobb tilbes il-band ta' xagħarha mal-polz. Taqbżilha vina ħelwa fuq moħħha meta tidħak. Hi qatt ma ħamlitha.