the Equivocators

Ilbieraħ wieħed mill-atturi tal-Aleateia (Gilbert Micallef) ħajjarni mmur nara dil-play u biex kif inkun hemm "nieħu xi ritratti" għall-okkażjoni. L-idea sibtha allattanti... intfajt hemm u intlift f'għexieren ta' immaġnijiet viżwali. Għal aktar ritratti żuru s-sit tiegħi u araw l-aħħar update fis-sezzjoni ta' 'people' numru 8.

N-Ħ-O-B-B-O-K

Poeżija li ġiet ippublikata m'ilux fi ktieb imsejjaħ: "Sejjaħli B'Ismek", publikazzjoni ta' Publikazzjonijiet Kamaleontiċi, misluta mill-pinna ta' Dario Grixti. Dawn t'isfel huma r-raġunijiet il-għala din ir-ripublikazzjoni elettronika tiegħi:

• Għax naħseb li ħaqqu udjenza usa';
• Għax naħseb li għad nisimgħu dwaru aktar 'il quddiem (fil-pożittiv, ovvjament);
• Għax modest wisq;
• Għax iħobb.

----------

N

Kieku l-fjuri sbieħ daqsek
Il-fjuri kollha tal-kampanja jinsterqu,

Kieku x-xemx sabiħa daqsek
Kulħadd għama jiċċassa lejha,

Kieku l-baħar sabiħ daqsek
Kulħadd għereq fih ifittxek.

Ħ

Illejla x’ħin inkunu fid-dlam
U jien nibda ngħid iċ-ċuċati
Tagħtix kasi,

Ibqa’ iċċassa lejn is-saqaf
Jew agħlaq għajnejk
U ibda oħlom,

Għada filgħodu x’ħin tqum
Issibni għadni nħares lejk
Ngħid iċ-ċuċati …

O

Illejla issejjaħlix b’ismi aktar,
Kif inkunu għaddejjin bil-karozza
Mit-triq imħaffra bi dmugħi,
Iftaħli l-bieba u ‘mbuttani ‘l barra.

Tħarisx mill-mera biex tara mittx,
Ħallini hemmhekk mixħut fin-nofs
Ninħasel f’demmi waqt li nixraq f’nifsi,
Sakemm jisbaħ u nibda nistħi mix-xemx.

B

Għandi aptit naqtagħlek il-kordi kollha,
indawwarhomlok ma’ għonqok,
u wara li nġiegħlek tkantali dik l-għanja,
li tqabbadni n-ngħas meta tkantahieli,
… inġebbed il-kordi,
u nibda ndoqq fuqhom il-melodija ta’ għanja,
sakemm int torqod ukoll …

B

Sa dan it-tant ħa nibqa’ nisma’ l-pjanu,
Li flimkien mal-vjolin l-iswed,
Qegħdin jinsġu l-aħħar xibka tad-dmugħ,
Minn għajnejja morda bil-maltemp blu,
Dak li jfisser il-friegħi tax-xemx,
U jigref salvaġġ f’wiċċ it-tifla innoċenti,
Li int qtilt fuq il-qabar t’ommi ilbieraħ,
Wara li sirt naf li jien jisimni …

O

Mill-istatwa tal-Madonna l-ħamra
Li hemm fil-qabar ma’ kantuniera
Qed jikbru zkuk tal-ward
Mingħajr fjuri ikkuluriti
Imma b’ħafna xewk imdellkin demm

K

Qed tismagħha l-mużika
Li qiegħda tkanta Dora?
Qed tismagħha l-melodija
Li ħierġa mill-pjanu mherri?
Qed tismagħha l-għanja
Li qed jgħanni l-amorin?
Qed tismagħha l-għajta
Li qed inwerżaq waqt li mmut?

Storja għas-Sibt filgħaxija, sbieh il-Ħadd

‘Ma nistax nifhem kif post skwallidu bħal dan ma jfallix f’din il-konċentrazzjoni eżaġerata ta’ pubs, ħwienet tax-xorb u mitt elf storbju ieħor’, ħasbet bejnha u bejn ruħha. Legilget l-aħħar erba’ belgħat mid-drink safrani tagħha u kompliet tiċċassa lejn is-siġġijiet żlugati u mqaxxrin mill-verniċ oriġinali tagħhom. Il-post kien antik, stil Irlandiż u bla ebda ħjiel ta’ influenza moderna. Kien hemm ħafna anglo-sassoni, min waħdu u min le, kollha bjondi jew redheads ibillu xufftejhom fir-ragħwa jew l-iskorċa tal-birra.

L-għarus tagħha kien qiegħed ibul fil-loki ta’ faċċata, probabbli qiegħed jirranġa n-naqra xagħariet imwaqqfin li fadallu u forsi jirranġa dik il-qmis imdeffsa fil-qalziet li ried jixtri akkost ta’ kollox waqt mawra fuq il-monti ta’ Ħal Qormi. Idjota. Anke xi tbajja 'l hemm u 'l hawn kellha.

In-naħa l-oħra lemħet tlett żgħażagħ – żewġ ġuvintur u tfajla - trio. Xebgħu jidħku, jiċċaċraw u jitkellmu jgħajjtu imma x’tista tistenna aktar minn nies ta’ dik l-età f’dal-ħinijiet? Għal mument xtaqet li tkun hemm, titmiegħek f’nofshom, moħħha għar-riħ imma taf li ma setgħet tagħmel xejn minn dan. Ħassitha xiħa ħdejhom. Diġà tfaċċat l-ewwel tikmixa u d-darba l-oħra lemħet xagħara bajda ftit ‘il fuq min widnejha x-xellugija. Imma ħadet żball, ma kinitx xagħra bajda, kienet biss illużjoni, rifless.

L-għarus tfaċċa. Ħxien u anke qsar xi naqa. Intefa’ addoċċ fuq is-sufan ħdejha u qarsilha kemm kemm koxxtejha. Ma qalilhiex kelma, tkellem mat-tazza birra li kien hemm quddiemu. Xorobha f’nifs wieħed qisu qatt ma xorob u meta lesta poġġa t-tazza fuq il-mejda b’tisbita tant li triegħdet. Pero ma nstema’ l-ebda ħoss minħabba l-mużika għolja li kien hemm. Stenniet it-tifwieqa ta' wara imma ma ġietx. Minflok qomos waħda bħallikieku żammha msakkra ġo l-istonku tiegħu.

Ma jridx jitkellem. Nixfu minn kull tip ta’ argument... titwerwer meta tipprova taħseb x’jista’ jsir minnhom sa għaxar snin oħra. Probabilment lanqas jibqgħu jorqdu fuq l-istess sodda. Jiġrilhom xi ħaġa hekk.

Ftakret li kellha xi ħames sigaretti umdi fil-handbag. Tawlet idejha u bdiet tħarbex fih tara ssibhomx. Il-pakket kienet remietu għax kien jeħdilha wisq spazju fil-handbag. Bl-għaġġla qasmet wieħed, bis-sebgħa l-ieħor qabdet ta’ ħdejh. Ħarġet is-sigarett u l-lighter fl-istess id u qaltlu: "Tlaqt sa barra npejjep... ". Taha ħarsa ta' approvazzjoni u kompla jiċċassa.

Kif kienet għadha fil-bieb tat in-nar għax barra kien hemm wisq riħ u kien ikun impossibli għaliha tqabbad dak id-daqsxejn tiben imnixxef. Qabbditu, daħna kbira u qabditha degħxa x’ħin ħabbtet wiċċha mal-bard modest t’April. Ħarset fil-bogħod tara n-nies nofshom fis-sakra, dwal iteptpu, flixkien jinkisru u lilha tpejjep.

F’dak il-ħin u l-mument rat daħna oħra ġejja min-naħa tax-xellug tagħha. Ittawlet u rat ġuvni, kien wieħed minn dak it-trio li rat qabel, forsi xi sentejn jew tlieta iżgħar minnha. Issa setgħet tarah aħjar għax intefa’ eżatt taħt il-lampjun rustiku tal-ħanut tax-xorb li kienu fih. Qabditu jittawlilha imma minnufih dawwar ħarstu n-naħa l-oħra. Għal mument beżgħet li seta’ ra dik ix-xagħarha bajda imma serrħet moħħha għax ftakret li dik li rat dakinhar kienet biss ċajta kerha tad-dawl stramb ta’ kmieni filgħodu. Baqgħet tiċċassa lejh sakemm dawwar ħarstu, apposta biex taqbadlu għajnejh.

Ħares.

Tbissmitlu.

Staħa.

Niżżel rasu l-isfel.

Reġa’ ħares, reġgħet qabditu, reġgħet tbissmitlu.

Iġġebdet u resqet lejh.

Inġibed lura, tbissem u tefagħlha ħarsa ta’ mqareb, qallha: "Aħjar le, int frotta projbita"

Spiċċalu s-sigarett u beda jinħaraq il-filter.

Daħal ġewwa, stenniet żewġ minuti u għamlet bħalu. Ma qagħditx bil-qiegħda, lill-għarus qaltlu li ddejqet u telqu d-dar. Meta jkunu sejrin lura lejn il-karozza dejjem jimxi xi metru jew tnejn qabilha, u tobgħodu fuq hekk.

La Dolce Vita

Ma naħsibx li tista’ titħabbeb mal-kultura Taljana (speċjalment dik Romana) u mas-sittinijiet u ma tkunx rajt, jew għallinqas smajt b’dal-film. Mill-pellicola rikka li ħarġet minn moħħ Federico Fellini, naraw ħajja ta’ xalar, alkoħol, sess, sigaretti u tuxedo all’Italiana. L’amore u saħansitra l-eżiżtenzjaliżmu jissemma xi ftit imma Marcello (Marcello Mastroianni) aljenat wisq fix-xalar u n-nisa barranin. M’hemmx ċans għal ħsibijiet tqal u lanqas għandu ħin biex jibda jħobb. Jagħżel li jgħix qalb is-sinjuruni, ix-xampanja u l-paparazzi li ma jieqfu qatt iberrqu bil-flashes. Interessanti wkoll l-apparizzjoni qasira ferm t'Adriano Celentano jkanta r-rock 'n roll u jiżżegleg tnejn.

Marcello Rubini: You are the first woman on the first day of creation. You are mother, sister, lover, friend, angel, devil, earth, home.

Transvestite: By 1965 there'll be total depravity. How squalid everything will be.

U finalment naħseb li ironika kif ftakart f'dal-film propju fil-Ġimgħa l-Kbira...

24

Wara li għamilt sbatax-il sekonda nismagħha, ddeċiedejt li ntawwalha b'sebgħa sekondi.

======

24 seconds of compassion
24 seconds of peace
24 seconds to remember love is the energy behind which all is created
24 seconds to remember all that is good
24 seconds to forget all your hurt and pain
24 seconds of faith
24 seconds to trust you again
24 seconds of radiance
24 seconds to send a prayer up
24 seconds is all you really need

It was starry inside Vincent

Dan il-weekend ġejt invitat nara l-ftuħ ta' eżibizzjoni msemmija "Secret", xogħol u għaraq l-artista lokali Lisa Falzon. Bħas-soltu, bqajt impressjonat. Jien ġej minn dinja kemmxejn differenti minn dik tal-pittura u meta nara immaġni nkun irrid infittex storja fiha. Infatti l-pittura astratta tikkawżali ftit tbatija biex nsir ħaġa waħda u nintilef fil-ħsibijiet remoti li l-artist jixtieq jgħaddili. Dan ma kienx assolutament il-każ waqt li kont qed indur biċċa biċċa l-arti ta' Lisa. Fost il-favoriti hemm Salmon Gold, Post-coital Jack and Jill u The Girl in the Dream.

Pero l-aktar waħda li ħallietni mesmerizzat kienet It was starry inside Vincent. Nibda billi ngħid illi Van Gogh diġà huwa l-pittur favorit tiegħi ta' kull żmien, aħseb u ara meta nara omaġġ bħal dak li nħema minn idejn lokali. Qabel ma qrajt it-titlu kont diġà bnejt titlu għalija personali li, bejn wieħed u ieħor jixbah lit-titlu preżenti. L-istilel, il-qata' tal-widna, ix-xagħar aħmar, "I often think that the night is more alive and more richly colored than the day" u infinitità ta' ħsibijiet oħra msakkrin f'50ċm ma' 40ċm (jew xi ħaġa hekk).

Għal dawk interessati l-eżibizzjoni se tibqa' għaddejja sal-5 ta' Mejju 2006 fis-sala prinċipali tal-kavallier ta' San Ġakbu, il-belt Valletta. Id-dħul huwa b'xejn u aktar informazzjoni tista' tinkiseb minn hawnhekk jew fis-sit uffiċjali tagħha stess.

[ sms, ballerina, dawl aħdar taċ-ċellulari, bla sigaretti ]

Ch-ch-ch-ch-changes

Daqsxejn bidla.

Iddeċiedejt li nkompli nkabbar l-għanqbuda kbira ta' blogs Maltin u barranin li hawn jeżistu fl-atmosfera billi żidt daqsxejn ta' kolonna fuq in-naħa tal-lemin. Kull ma kien jinvolvi daqsxejn modifikazzjoni tal-lingwa html. Tiskopri li wara kollox, dil-lingwa hija biss mostru li meta timmansaha isir soft toy bla ħajja. Jekk forsi insejt lil xi ħadd, skużawni imma probabilment ifisser li dak il-blog mhuwiex imniżżel fil-favoriti tiegħi.

PS. Hija sempliċement kumbinazzjoni li l-bloggata tal-llum qed tintefa' fuq dal-blog kważi eżatt fil-ħin li ntefgħet dik tal-bieraħ.

Xott daqs frawla...

Wara dil-bloggata, wara li dil-arja ġabitni xott daqs frawla u wara li smajt lil Beatles.

Let me take you down, 'cos I'm going to Strawberry Fields
Nothing is real, and nothing to get hungabout
Strawberry Fields forever

Living is easy with eyes closed, misunderstanding all you see
It's getting hard to be someone but it all works out
It doesn't matter much to me

Let me take you down, 'cos I'm going to Strawberry Fields
Nothing is real, and nothing to get hungabout
Strawberry Fields forever

No one I think is in my tree, I mean it must be high or low
That is you can't you know tune in but it's all right
That is I think it's not too bad

Let me take you down, 'cos I'm going to Strawberry Fields
Nothing is real, and nothing to get hungabout
Strawberry Fields forever

Always, no sometimes, think it's me
But you know I know when it's a dream
I think I know I mean a "Yes" but it's all wrong
That is I think I disagree

Let me take you down, 'cos I'm going to Strawberry Fields
Nothing is real, and nothing to get hungabout
Strawberry Fields forever
Strawberry Fields forever
Strawberry Fields forever.

ouT oF focuS

one photo out of focus is a mistake · ten photos out of focus are an experimentation · one hundred photos out of focus are a style