Weekend in pictures

Hectic weekend, very much indeed. Better describe it in pictures...

And you need not worry folks, Roxanne will have her own comeback in a couple of days.

Roxanne (ii)

Ħarġet-il barra biex tfittex tasal id-dar. Qabdet tal-linja u sakemm waslet id-dar kienet insiet kull ħaġa li ġrat f’dak il-burdell immuffat ta’ dar.

Waslet darha. Malli daħlet kważi tfixklet f’dublett li kellha mixħut addoċċ mal-art. Tgħaddi ħafna minn ħinha barra u ma tantx ikolha ċans tagħti kas tara jekk darha hix pupilla jew le. L-ewwel ħaġa li ġietha f’moħħha biex tagħmel kien li tmur tieħu xower komdu u sħun. Lestiet u bdiet tiżbarazza bil-mod.

Għaddew xi erba’ sigħat minn mindu daħlet id-dar meta daqq it-telefon ippanikjat. Ħasadha għax it-telefon għandu vizzju jdoqq meta lanqas li tkun qed tistennieh. Tmut bil-piena tistennieh idoqq u ma jdoqqx. Qabżet żewġ kotba li poġġiet ma’ l-art u għaġġlet biex twieġbu qabel mal-persuna tan-naħa l-oħra taqta’ qalbha, tonfoħ tnejn u taqta’. Qabdet ir-riċevitur b’ħeffa u rranġat l-gerżuma biex tkun tista’ titkellem sew.

“Hello!” qalet b’nifisha ħarira maqtugħ.

“Hemmhekk Joanne?”

L-intunazzjoni li ġiet mitkellma l-kelma “Joanne” issuġġerielha li dan jixtieq jingħaqad mal-lista twila ta’ klijenti li għandha. Ferħet nofs ferħa. Filwaqt li ippreparat biex twieġbu, ippreparat ukoll l-aġenda s-sewda biex tara fejn se ddaħħlu.

“Iva jien hi… għandek bżonn xi ħaġa?” Lagħbitha tal-belha.

“Meta se niltaqgħu?”

“Int tajjeb għalik il-ġimgħa, fil-ħdax ta’ bil-lejl, quddiem il-funtana l-antika?”

“Iva tajjeb. Kemm tieħu?”

“Ħamsin lira, lejl kollu.”

“Orrajt. Niżżel ‘is-Sur Galdo’, jien hekk isibuni l-ħbieb. Niltaqgħu u pprova żommu l-ħin.”

Joanne kienet se tikkonfermalu meta semgħet il-ħoss deludenti ta’ xi ħadd li qata’ l-linja. Stramb! Ta’ ftit kliem… imma ma’ komplietx taħseb fuqu għax għamlitha ċara qabel ma’ daħlet f’dik id-dar li l-ħsibijiet tax-xogħol tħallihom mill-bieb-il barra u kompliet fuq xogħolha. X’ħin deherilha illi lestiet u rranġat darha aħjar minn qabel waqfet mix-xogħol u strieħet ftit fuq is-sufan. Imbagħad bdiet taħseb kif se tqatta’ l-ġurnata. Kienet għadha ma ddeċidietx, qabdet il-handbag u ħarġet-il barra mingħajr ma kellha ħjiel ta’ fejn sejra.

Ħarġet iddur fit-triqat dritti u nobbli tal-belt. Ittawwlet lejn il-vetrini mimlijin manikini…kellhom ilbies aħjar minn tagħha. Il-bard kien qiegħed jgħannaq fi ħdanu lil kulħadd. Joanne tkebbet kemm setgħet. Kulħadd kien għaddej għall-affari tiegħu, ma kontx issib nies qaqoċċa jitkellmu jew oħrajn jitbissmu tbissim mistħi lejn xulxin, xejn, ħlief gdiedem sal-art u għaġġla sfrenata. Joanne dak li riedet; ħadd ma jsellmilha, ħadd ma jidħkilha, kulħadd iħalliha bi kwietha.

Waqt li kienet qed tipprova iżżomm ir-ritmu tal-passi tagħha ma’ l-istil taċ-ċangaturi li kien hemm mwaħħlin mal-art, imnifsejha twessgħu u laqgħu fwieħa tfuħ ta’ kafè maqtugħ frisk minn taħt ix-xemx sħuna Kolumbjana jinħema. Daħlet fil-kafeterija żgħira biex tgawdi ftit minn dik is-sħana artifiċjali li kien hemm hemm ġew. Poġġiet fuq mejda li quddiemha kien hemm tieqa kbira tagħti għat-triq. Qagħdet bilqiegħda u ordnat mill-ewwel. Skantat mhux ftit meta ftit sekondi wara wasal dak li ordnat.

Kompliet taħseb fuq mitt ħaġa filwaqt li tosserva kull wiċċ ġdid li jkun għaddej minn quddiem il-ħanut. Min jaf x’kien hemm moħbi f’kull wiċċ? X’għandhom f’moħħhom u f’qalbhom dawk in-nies li ta’ kuljum joqgħodu b’erba’ mitt għajn li ma tmurx taqbżilhom xi kelma dwarhom infushom? X’hemm wara wiċċ imqarras? X’hemm wara wiċċ daħkan? X’hemm wara bewsa?

Imma issa ddejqet taħseb u ħarset lejn it-televixin imwaħħal fir-rokna, -il fuq minn kulħadd. Dak il-ħin kienu qed jixxandru l-aħbarijiet meta, b’diffikultà, Joanne irnexxielha tisma’ x’kien qed jgħid ix-xandar. Kienu għadhom kif sabu raġel mejjet fi ġnien ta’ dar abbandunata. Għadhom ma jafux ismu, jidher li la kellu familja u lanqas ħbieb. Il-pulizijia ma jeskludux li seta’ kien każ ta' suwiċidju. Imma kien għadu kollox inċert. Joanne tħassret lill-mejjet għal ftit imma xi ħaġa interrompititilha dal-ħsieb. Minn taħt il-għajn rat s-saqajn tas-siġġu ta’ ħdejha jiżżerżqu ma’ l-art. Ħallietu jiżżerżaq, ħasbet li xi ħadd kellu bżonnu aktar minnha. Veru xi ħadd riedu imma riedu biex joqgħod ħdejha. Dawwret ħarsitha u rat li kien hemm raġel twil, ftit imkemmex. Għajnejn suwed faħma penetranti bħal ta’ żagħżugħ Tork. Baqgħet tħares lejh tistennieh jitkellem. Poġġa bilqiegħda ħdejha sieket u ħarsilha ħarsa serja donnu se jħabbrilha aħbar ta' mewt.

Tkellem: “Miskin” u niżżel ħarstu ‘l isfel mingħajr ma baxxa rasu. Joanne baqgħet tħares mingħajr ma tafx x’se tgħid. Imma ma laħqetx ħasbet malajr għax laħaq reġa’ tkellem hu :

“Min jaf x’kienu l-aħħar ħsibijiet tiegħu qabel ma miet!”

Joanne baqgħet ma tkellmitx tipprova issib x’tgħid biex ma tibqax imbarazzata kif kienet. Baqgħet tħares lejh... u għal darb’oħra reġa’ tkellem hu:

“Jien dejjem inkun f’dan il-ħanut żgħir f’dawn il-ħinijiet. Hawnhekk vera narah qisu l-mekka taċ-ċivilizazzjonijiet, dejjem tara nies ġodda ta' kull lewn kollha għall-affari tagħhom, ħadd ma jkellem lil ħadd. Nħobbha wisq l-privatezza... forsi vizzju naf, imma min twieled tond ma jmutx kwadru.”

Għal mument ħassitu jaqralha qalbha. Kompliet miegħu:

“Għandek raġun. Minħabba dik ir-raġuni jien kelli nitlaq minn raħal twelidi u ġejt ngħix hawnhekk. Inti ilek toqgħod hawn? ”

“Le m’ilnix wisq imma xtaqt li ilni. Isma’ fuq kollox inti x’jismek? ”

“Jien Joanne”

“Jien Alfred, għandi pjaċir. X’tagħmel sabiħ fil-ħajja?” Din kienet waħda mill-mistoqsijiet li Joanne dejjem xtaqet taħrab.

“Bħalissa ninsab bla xogħol… qabel tlift il-ġobb li kelli kont ilħaqt warrabt xi ftit flus biex ngħix xi xhur komda bla xogħol”

“Ara x’kumbinazzjoni, bħalissa għandi bżonn segretarja fl-uffiċju. Ma tantx għandha bżonn kwalifiki ħlief xi żewġ ‘O’ Levels. Int għandek xi ħaġa?”

“Kwalifiki ma tantx għandi imma għandi l-‘O’ Level tal-Malti, l-Ingliż u l-Matematika. Dawk biss kont studjajt. ”

“Għandek l-aqwa kwalifiki. Għandek xi esperjenza f’xi xogħol ieħor?“

Reġgħet ħasbitha. “Kont naħdem f’fabbrika, imma għal ftit xhur biss” wieġbet xotta xotta biex mill-ewwel tinfurmah li ma tantx tinqala’ għal dan it-tip ta’ xogħol. Imma hu ma tax kas ta’ dan u qal:

“O.K. mela nagħtik l-esperjenza jien. Tista’ tibda minn nhar it-tnejn fit-tmienja. Din il-ġurnata se tkun biss biex nara kif se tmur. Taċċetta?”

“Naċċetta! Grazzi! Ilni ħafna nfittex xogħol. Għaldarb’oħra grazzi ħafna!”

Fl-aħħar kienet sabet xogħol! Għal mument bdiet taħseb fuq kemm hu orrajt u simpatku dan Alfred u nsiet għal kollox il-ħarifa li kelli taffronta kull lejl. Il-konversazzjoni malajr spiċċat u issa kompliet tikkonvinċi ruħha kemm għamlet tajjeb meta aċċettat il-proposta li għamlilha Alfred. Telqet id-dar ferħana se ttir għax għalkemm qatt m’ammettiet issa bdiet tammettiħ; ix-xogħol ta’ prostituta ma kienx xi xogħol li jirrendilha il-miljuni tal-liri. Ħasbet biex għall-mument tħallih naqra mwarrab u tibda taħseb fuq dan ix-xogħol il-ġdid. Mur għidilha lil ommha li sabet xogħol f’uffiċju pulit, imma baqgħet ċerta li anke għal dak ix-xogħol kienet se ssib ix-xagħaraha fl-għaġina. Iddeċiedet li din l-aħbar iżżommha għaliha.

Roxanne (i)

Kultant tiskanta x'kapaċi ssib f'hard disk qadima li bilkemm tesa 1GB. Dan l-aħħar sibt dil-istorja żgħira li kont ktibt lejn il-bidu tas-sena 2001 meta kont għaddej minn fażi fejn anke kuċċarina maħmuġa mitluqa fuq is-sink kienet timmotivali l-immaġinazjoni biex nikteb rumanz. Din t'isfel hija ċensurata u mmodifikata daqsxejn għal raġunijiet ta' grammatika, etika u sintassi. Aktar min hekk dan t'isfel huwa biss terz tal-istorja oriġinali. Il-ġiex terzi l-oħra forsi nippublikahom fuq dal-blogg fil-jiem li ġejjin (jekk insib biżżejjed ħin!).

···

Remgħet il-filter tas-sigarett ma’ l-art taħt il-bankina u ħarset bla interess lejn is-siġra nofsha niexfa tiċċaqlaq u żżaqżaq ma' kull żiffa mqanżħa. Kienet qiegħda biss tipprova tiftakar jekk nesietx xi ħaġa warajha. Imma kull ma jmur dejjem kompliet tikkonvinċi ruħha li ma nsiet xejn. Insiet biss x'kien isem il-klijent li kelli tiltaqa' miegħu f'dak il-waqt. Dejjem hekk jiġrilha... kien grazzi għall-aġenda sewda li ġġorr dejjem magħha li ffriżat il-memorja fuq dak li jmissu jiġi jgħaddi siegħa jew tnejn magħha.

Kien is-sur Scerri. Min jaf jekk kienx xi xiħ li ħlief ibeżlaq ma jafx. Irranġat ftit id-dublett magħha għax kien issikkat ħafna u wara ħarġet mera żgħira biex ma jmurx ikun hemm xi rtokk mhux f'postu. Irranġat ftit il-lipstick li kien niżel ftit minn ma’ xufftejha b’biċċa tixxju. Baqgħet tistenna hemm fejn kienet tittama li kull dawl ta’ karozza jkun il-klijent tagħha. Kienet tiddejjaq ħafna tistenna, kienet tippreferi teħles ħalli tfittex tmur lejn id-dar. Issa li kienet ilha dawk is-sentejn li għosfrot minn dar twelidha kienet tħossha indipendenti daqs Malta f'nofs is-sebgħinijiet. Pero Malta wkoll kellha taqdef, kellha tissikka ċ-ċintorin... hi lanqas biss ċintorin ma kellha biex tixtri fl-ewwel xhur. Qabel, id-dar t’ommha ħlief qrid ma kienx hemm, zekzik il-ħin kollu u kemm ommha u kemm ħutha ċaħdu li tiġi minnhom. Imma mur għidilhom li fl-iskola kienet boqqa brodu u l-ftit li kienet taf ma tantx kien serviha - għaldaqstant flok m’għazlulha ġob huma, il-ġob spiċċat għażlitu hi. Xogħol antik daqs is-sengħa tat-tagħsir tal-għeneb li għalkemm ma kienx xi ġob li jisqiha ix-xampanja u jitmagħha l-kavjar, hi kienet kuntenta u hekk għallinqas kienet indipendenti. Marret f’dal-post apposta fejn ma jafha ħadd u tkun tista’ tagħmel li trid mingħajr ħadd ma jniffidha il-ħin kollu b’ħarsa li taf lil ommha f'bejta sriep.

Il-karozza għadha ma dehritx u kemm-il darba ħasbet biex titlaq ‘l hemm imma s'issa għadha qatt ma rat karta tal-għoxrin lira tikber fis-siġar. Baqgħet bil-paċenzja kollha tistenna lil dan il-‘proxxmu’.

Fl-aħħar bdiet tara karozza li bdiet tnaqqas is-saħħa u tersaq qajla lejha. Waqfet u rat lil xi ħadd imkebbeb bid-dellijiet jiġġebbed biex jiftaħ it-tieqa li tagħti għall-bankina. It-tieqa infetħet sa tlett kwarti u nstemgħet vuċi minn ġewwa li kienet tinstema’ xi ftit batuta:

“Inti Joanne?”

“Iva, u inti naħseb is-sur Scerri. Iftaħli għax qed niksaħ hawn barra.”

Il-klijent ma tkellimx u fetaħ il-bieba. Daħlet u dak il-ħin għajnejn is-sur Scerri ġrew tul saqajn Joanne li peresli riedet tpoġġi d-dublett diġà qasir kompla jonqos u jiżvela l-ġilda xemgħa ta' Joanne. Joanne ħasset għajnejh... kieku f'ċirkostanzi oħra kienet tħarislu tnejn bl-herra u ġġebbed u traqqa'. Ħallietu jħares ħalli meta jkun qed jitkellem ma’ sħabu l-qżieqeż l-oħra b’xi flixkun birra quddiemu jkun jista' jagħmlilha reklam tajjeb, u forsi ikollha l-aumento.

Il-ħin ta’ l-ammirazzjoni issa għadda għax is-sur Scerri kellu jibda jikkonċentra fuq il-magna li kien beda jsuq. Barra t-triq kellu wkoll f’moħħu kif kien beħsiebu jgħaddi l-lejla u xtaq li ma tgħaddi qatt. Ir-raġel beda jnaqqas u kien qisu beda jgħarrex ħa jara fejn se jipparkja. Waqaf u għamlilha sinjal b’rasu biex tinżel u għamlet kif qalilha, awtomatikament bdiet issegwih għax assumiet li kienu sejrin id-dar tiegħu.

Baqgħet issegwih sakemm waslu fuq il-bankina ta’ dar kbira u qadima. Ħareġ iċ-ċwievet b'ċerta kalma, donnu ried igawdi kemm jista’ l-ħoss taċ-ċekċik taċ-ċwievet u fetaħ. X’ħin fetaħ ħarġet riħa li daret ma Joanne bħal dak it-tip ta' kowt li jiġik eżatt meta tippruvah għand tal-ħanut u għal dik is-sekonda jiġik il-ħsieb li tibqa' ħiereġ bih. Kull meta tmur għand xi ħadd dejjem ixxomm riħa ġdida u differenti għal kollox mid-dar tiegħek. Bdiet tidraha bil-mod u kompliet kif għamlet qabel billi segwietu waqt li hu beda bil-mod tiela’ it-taraġ.

Din id-dar kienet ħafna aktar differenti minn tagħha. Ħasbet li s-sur Scerri jew is-sid tagħha kien sinjurun kbir għax kien hemm ħafna affarijiet ileqqu ippolixjati sew u kif suppost. Baqgħu deħlin fil-kamra tas-sodda. Dar mill-ewwel wiċċu lejha u ħasadha:

“Inża u ntefa’ fuq is-sodda l-kbira. Tantx iddum għax jien ma nħallasx biex noqgħod nistenna imma biex ingawdi. Għandek ċans erba’ minuti, kif nidħol irrid nsibek lesta għal dak li nħobb jien. Fhimt!” qallha bla ebda ħjiel ta' ġentilezza.

“OK” wieġbet Joanne mismuta u kważi miksura minn din ir-reazzjoni. Qatt ma stennietha reazzjoni imma għamlet kif qalilha, l-aqwa li ddaħħal xi ħaġa tal-flus. Hu ħareġ il-barra u stennietu jagħlaq ħa tibda tinża. L-ewwel ma neħħiet kien il-flokk li kien jikxfilha parti kbira minn sidirha. Neħħietu u stenniet li se ssib il-bra imma ma sabet xejn u ftakret li qabel ma jibda x-xogħol dejjem kienet tneħħih. Tgħaxxqet b’ġisimha u rringrazzjat lil min ipprovdijula għax tassew kellha biex tiftaħar. Imma malajr insiet ir-ringrazzjamenti u kompliet tinża tagħmel ħsejjes mill-anqas. Kienet lesta u ntefgħet mimduda fuq sodda li kienet tesa’ żewġ persuni mdaqqsin. Fuq is-sodda kien hemm lożor ċelesti, il-kulur għoġobha u ma dejjaqiex imiss magħha. Qagħdet f’posizzjoni mill-aktar provokanti u stennietu jidħol.

Wara ftit taqtigħat rat il-pum jibda jiċċaqlaq u wara ftit żaqżiqa rqiqa. I-bieb infetaħ u rat lis-sur Scerri dieħel wara l-bieb. Fuq wiċċu kellu tbissima xi ftit mitfija. Beda jiċċaqlaq bil-mod u Joanne kienet se tipprova tgħaġġlu imma le, la ħallas għandu dritt igawdiha kif irid hu. Baqa’ miexi bil-mod sakemm tkebbeb ħdejha fuq is-sodda. Trasset miegħu u missitu kemm kemm biex tibda tqanqallu l-emozzjonijiet l-aktar li kellu moħbijin. Hu deher qed iħoss xi ħaġa differenti. Neża l-aħħar qalziet li kien għad kellu u ġebbidha aktar lejh. Beda jbusha b’bews tal-klieb, bla ebda direzzjoni u mingħajr ebda ħjiel ta' passjoni senswali. Meta kien jasal fix-xifer ta' wiċċha kien jerġa' jitla’ ‘l fuq biex issa it-tnejn li huma kienu qed iħossu dak li ċ-ċelibati dejjem jittammaw li xi darba għad jagħmlu, jekk mhux f’din id-dinja għallinqas fid-dinja l-oħra.

Il-qamar ma kienx jidher u minfloku kien hemm sħab li trid tkun derrejt għajnejk fid-dlam biex tarah. Ir-riħ beda dejjem iżid...

···

Beda dieħel l-ewwel dawl mit-tieqa meta Joanne qamet mis-sodda b’damdim kbir f’rasha. Rat lis-sur Scerri għadu rieqed. Issa seta’ jistrieħ, issa li ħa dak li kellu jieħu. Qamet bil-mod minn fuq is-sodda u għarwiena kif kienet bdiet tfittex waħedha. Ħarset lejn is-siġġu li kien hemm quddiem il-mera u hemmhekk rat ġlekk, dak li s-sur Scerri uża biex ġie għaliha. Marret mill-ewwel fuqu u bdiet tfittex biex forsi ssib il-kartiera. Sabitha u ferħet. Fetħitha malajr u sabet li kull ma kien hemm kienet karta ta’ l-għaxar liri u biċċa karta b’xi numri li assumiet li kienu xi numri tat-telefon. Stenniet li kienet se ssib xi ħaġa aktar tal-flus, imma ma komplietx tgerger waħedha u ħatfet l-għaxar liri minnufih. Libset malajr u ddeċidiet li lil dan il-klijent tħallilu nota li kitbitha malajr fuq biċċa karta b’bajrow li sabet fuq il-gradenza xi ftit imgerrma minn fuq:

‘Jekk tkun tridni, taf fejn issibni. Saħħa.’

M.U.S.C.

Ġejt mikri biex niffriża dan l-avveniment li jsir darba fis-sena mill-Klabb Universitarju tal-iSports. Aktar immaġnijiet fuq is-sit tiegħi tas-soltu.

www's

Been doing lots of www's for the past two weeks (maybe this is the reason why my very recent postings have been this close to crap). First and foremost I felt the desperate need to move my website to a more proper hub server, minimising the slowness of pre-loading and any other similar inconveniences to the visitor. So there you go, as fresh as never before! Will also be doing some light face-lift in the coming days/weeks, so watch out!

Have also been asked to design a basic website for a well-renowned night club in Malta - Amazonia. I managed to come up with this - www.amazoniamalta.com. Will be doing some further photography re: nightclubbing in Malta, in the meantime enjoy this:

Sommarlek

- "Għandi aptit niklok kollok!"
- "Ħeq, imbagħad x'jibqa' minni? ;)"

...wara versett f'Summer Interlude/Sommarlek.

L'amour ne nous déchirera pas

Fit-30 ta' April kelli l-pjaċir nimmira l-lenti quddiem żewġ żgħażagħ mill-art tal-inbid u l-ġobon (Franza) li fetttlilhom ipassu daqsxejn fuq dil-gżira u jaljenawna naqa' mill-pastizzi, l-vari tal-karta pesta u d-Da Vinci code. Daqqew diversi diski bit-tema 'L'amour ne nous déchirera pas' (Love will not tear us apart) - modifikazzjoni 'ħelwa' tat-titlu ta' diska ikona fid-dinja tal-mużika indie; Love Will Tear Us Apart tal-Joy Division.

Grazzi jmur lil dawn in-nies li għenu biex dan l-avenniment iseħħ mingħajr ħafna nejk u tqanżiħ:

• Pawlu tal-alternativemalta.com (ħu ħsiebha dik iz-Z2 Pawl!);
• il-Beanies;
• Cisk Lager (mhux għax qatt xi darba kont fanatiku tal-birra, imma dakinhar birra biss xrobt).

Aktar ritratti hawnhekk (monochrome >> 07) ...